Sokhayouk

អ្នកជំនាញជួបពិភាក្សាលើសេចក្ដីព្រាងច្បាប់យុត្តិធម៌អនីតិជន

Sokhayouk — Thu, 16 Dec 2010 09:53:07 +0000

ភ្នំពេញ៖ សេចក្ដីព្រាងច្បាប់យុត្តិធម៌អនីតិជន ដែលមាន១៥ជំពូក និង ៨៦ មាត្រា ដែលបានបង្កើតឡើង ដោយរដ្ឋាភិបាលកម្ពុជាត្រូវគេរំពឹងថា នឹងជួយការពារសិទ្ធិ និងអត្ថប្រយោជន៍របស់អនីតិជនប្រព្រឹត្តល្មើសនឹងច្បាប់ ពិសេសនឹងធានាលើអនីតិជន ដែលមានអាយុក្រោម១៤ឆ្នាំ ឲ្យរួចផុតពីការទទួលខុសត្រូវលើបទព្រហ្មទណ្ឌ ចំពោះករណីល្មើសច្បាប់របស់ពួកគេ។

ថ្លែងនៅក្នុងសិក្ខាសាលាថ្នាក់ជាតិស្ដីពីការស្វែងរកមតិគាំទ្រលើ សេចក្ដីព្រាងច្បាប់យុត្តិធម៌អនីតិជន ដែលបានប្រព្រឹត្តទៅនៅសណ្ឋាគារ និងបនល្បែងណាហ្គាវើល កាលពីម្សិលមិញ លោក អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានបញ្ជាក់ថា សេចក្ដីព្រាងច្បាប់នេះបានរៀបរៀងឡើង តាំងពីឆ្នាំ ២០០២ ដោយមានការចូលរួមប្រឹក្សាយោបល់ ពីអង្គការយូនីសេហ្វ និងអង្គការដៃគូមួយចំនួនទៀតដែលធ្វើសកម្មភាពលើកស្ទួយសិទ្ធិ និងសុខុមាលភាពរបស់កុមារ។ លោកមានប្រសាសន៍ថា៖ “សេចក្ដីព្រាងច្បាប់យុត្តិធម៌អនីតិជននេះ គឺជាឧបករណ៍សម្រាប់ការពារសិទ្ធិ និងផលប្រយោជន៍របស់កុមារ នៅគ្រប់កាលៈទេសៈ និងគ្រប់ទីកន្លែងទៅតាមផ្លូវច្បាប់”។

លោក អ៊ិត សំហេង បានបញ្ជាក់ទៀតថា នេះជាលើកដំបូងហើយដែលប្រទេសកម្ពុជា នឹងមានច្បាប់ដោយឡែកពិសេសមួយ សម្រាប់កុមារដូចបណ្ដាប្រទេសរីកចម្រើនជឿនលឿនលើពិភពលោកដែរ។

យោងតាមមាត្រាមួយចំនួនដែរបានចែងក្នុងសេចក្ដីព្រាងច្បាប់នេះ ដែលទទួលបានកាលពីម្សិលមិញបានគូសបញ្ជាក់ថា រាល់បទល្មើសដែលបានប្រព្រឹត្តដោយកុមារដែលមានអាយុក្រោម១៤ឆ្នាំ មន្ត្រីនគរបាលយុត្តិធម៌ មិនអាចចាប់ឃាត់ខ្លួន ឬ បង្ខំឲ្យពួកគេទទួលខុសត្រូវព្រហ្មទណ្ឌឡើយ ប៉ុន្តែមន្ត្រីនគរបាលយុត្តិធម៌ អាចចាប់ឃាត់ខ្លួនចំពោះកុមារដែលមានអាយុពី ១៤ឆ្នាំ ដល់ក្រោម១៨ឆ្នាំ ក្នុងករណីពួកគេ បានប្រព្រឹត្តបទល្មើសមជ្ឈិម ឬ ឧក្រិដ្ឋជាក់ស្ដែងប៉ុណ្ណោះ ឬក្នុងករណីមានដីកាបង្គាប់ឲ្យនាំខ្លួន ឬដីកាចាប់ខ្លួនពីអាជ្ញាធរតុលាការ។”អនីតិជនប្រព្រឹត្តល្មើសនឹង ច្បាប់ដែលមានអាយុក្រោម១៤ឆ្នាំ មិនទទួលខុសត្រូវទោសព្រហ្មទណ្ឌទេ” នេះជាបទចែងក្នុងមាត្រា ៧នៃសេចក្ដីព្រាងច្បាប់នេះហើយក្នុងមាត្រា ១៤បានសរសេរទៀតថា “អនីតិជនប្រព្រឹត្តល្មើសនឹងច្បាប់ដែលមានអាយុក្រោម ១៤ឆ្នាំ ដែលជាប់សង្ស័យថា បានប្រព្រឹត្តល្មើសមន្ត្រីនគរបាលយុត្តិធម៌មិនត្រូវឃាត់ខ្លួនឡើយ។ ក្នុងករណីនេះមន្ត្រីនគរបាលត្រូវប្រគល់អនីតិជននោះទៅឲ្យឪពុកម្ដាយ ឬអ្នកអាណាព្យាបាលវិញ”។

លោកស្រី យឹម សុខារី ប្រធានគណៈកម្មាធិការប្រតិបត្តិនៃគណៈកម្មាធិការអង្គការមិនមែន រដ្ឋាភិបាលដើម្បីសិទ្ធិកុមារបានថ្លែងនៅក្នុងសិក្ខាសាលានេះថា កុមារពិតជាពុំទាន់មានសមត្ថភាពគិតពិចារណាត្រឹមត្រូវគ្រប់គ្រាន់នៅ ឡើយទេពួកគេអាចប្រឈមនូវបញ្ហាជាច្រើន និងអាចក្លាយជាជនល្មើស ឬរងគ្រោះដោយសារសេពគប់មជ្ឈដ្ឋានមនុស្សខុសការមិនយកចិត្តទុកដាក់ពី សំណាក់ក្រុមគ្រួសារនិងសហគមន៍ ការធ្វើចំណាកស្រុក ការបែកបាក់ឪពុកម្ដាយ ភាពក្រីក្រអំពើហិង្សាក្នុងគ្រួសារ និងកង្វះការអប់រំ។ លោកស្រីបានបញ្ជាក់ថា៖ “ព្រោះតែបញ្ហាក្រពះ កុមារមួយចំនួនគ្មានជម្រើសអ្វីក្រៅពីការប្រព្រឹត្តអំពើល្មើសនិង ច្បាប់ដូចជា ការលួច ឆក់ និងឈានដល់អំពើប្លន់”។

លោក អ៊ិត សំហេង មានប្រសាសន៍ថា បច្ចុប្បន្នកុមារទំនាស់នឹងច្បាប់កំពុងមានចំនួនកាន់តែច្រើនឡើង ពិសេសនៅរាជធានីភ្នំពេញ ហើយមួយចំនួនក្នុងចំណោមពួកគេ ត្រូវបានចាប់បញ្ជូនទៅកាន់មជ្ឈមណ្ឌលយុវនីតិសម្បទានៃក្រសួង សង្គមកិច្ច និងខ្លះទៀតត្រូវបានបញ្ជូនទៅដាក់ក្នុងពន្ធនាគារ។

លោកក៏បានបញ្ជាក់ផងដែរថា៖ “កន្លងមកកុមារមួយចំនួនត្រូវបានឃុំខ្លួនបែបនេះ ធ្វើឲ្យប៉ះពាល់ដល់សិទ្ធិកុមារក្នុងការ ទទួលបានការថែទាំសមស្រប”។

ទោះជាបែបណាក៏ដោយ ការសម្រេចផ្ដន្ទាទោស ឬការប្រកាសទណ្ឌកម្មព្រហ្មទណ្ឌទៅលើអនីតិជនល្មើសច្បាប់ ដែលមានអាយុចាប់ពី១៤ឆ្នាំ ទៅក្រោម ១៨ឆ្នាំ សេចក្ដីព្រាងច្បាប់នេះ ក៏បានតម្រូវឲ្យតុលាការសាលាដំបូង និងតុលាការជាន់ខ្ពស់ពិនិត្យពិចារណា លើកាលៈទេសៈស្ថានភាព និងសតិបញ្ញាស្មារតីនៃជនជាប់ចោទដោយរួមបញ្ចូលទាំងកត្តាសម្រាល ផ្សេងៗទៀតផងដែរ។ តុលាការសាលាដំបូង ឬជាន់ខ្ពស់ អាចសម្រេចប្រគល់ទណ្ឌិតជាអនីតិជន ដែលត្រូវបានផ្ដន្ទាទោសទៅឲ្យមណ្ឌលស្ដារនីតិសម្បទារាជធានី-ខេត្ត ដែលយល់ឃើញថា សមស្រប។

លោក ហ៊ី សោភា រដ្ឋលេខាធិការ ក្រសួងយុត្តិធម៌បានថ្លែងបញ្ជាក់នៅក្នុងសិក្ខាសាលាថា ទោះជាយ៉ាងណាក៏ដោយ ក៏ការសម្រេចឃុំខ្លួនអនីតិជនគឺជាជម្រើសចុងក្រោយបំផុត៕

Source: http://women.open.org.kh/km/expert-dicuss-law-drafting

រដ្ឋមន្ត្រីកិច្ចការនារីអំពាវនាវឲ្យ ប្រុងប្រយ័ត្នក្រែងចាញ់បោកជនបរទេសក្រោមរូបភាពរៀបការធ្វើជាភរិយា តែធាតុពិតយកទៅធ្វើជាអ្នកបម្រើទៅវិញ

Sokhayouk — Thu, 16 Dec 2010 08:57:12 +0000

ភ្នំពេញ៖ រដ្ឋមន្ត្រីក្រសួងកិច្ចការនារីលោកស្រី អ៊ឹង កន្ថាផាវីបានធ្វើការអំពាវនាវដល់ប្រជាពលរដ្ឋត្រូវប្រុងប្រយ័ត្ន ចំពោះជនបរទេសមួយចំនួនដែលមករៀបការជាមួយនឹងនារីកម្ពុជា ថាយកធ្វើជាភរិយាហើយយកទៅរស់ នៅជាមួយនៅឯបរទេស ប៉ុន្តែធាតុពិតយកទៅធ្វើជាអ្នកបម្រើទៅវិញ។

លោកស្រីបានបញ្ជាក់ថា សង្គមវិវត្តន៍ជឿនលឿនទៅមុខជានិច្ចហើយអ្នកដែលប្រព្រឹត្តបទល្មើសនោះ ចេះតែមានគំនិតថ្មីៗដើម្បីកេងប្រវ័ញ្ចទៅលើប្រជាពលរដ្ឋដែល ខ្វះខាតចំណេះដឹងខ្វះខាតព័ត៌មាន ដូច្នេះយើងត្រូវតែប្រុងប្រយ័ត្នចៀសវាងរាល់រូបភាពគ្រោះថ្នាក់អស់ នោះ។

កាលពីថ្ងៃទី០៦ ខែធ្នូ លោកស្រី អ៊ឹង កន្ថាផាវី បានអញ្ជើញធ្វើជាអធិបតីនៅក្នុងពិធីយុទ្ធនាការបំពាក់បូពណ៌សក្រោម ប្រធានបទ “រួមគ្នាបំបាត់អំពើហិង្សាគ្រប់រូបភាព លើស្ត្រី និងកុមារដើម្បីអភិវឌ្ឍន៍សង្គម” នៅក្នុងក្រសួងកិច្ចការនារីដោយមានការចូលរួមស្ត្រីផ្សព្វផ្សាយ ស្រាបៀ និងស្ត្រីនៅក្នុងសេវាកម្សាន្តចំនួន៥០០នាក់។

លោកស្រី ហោ ម៉ាលីន អនុរដ្ឋលេខាធិការក្រសួងកិច្ចការនារីបានមានប្រសាសន៍ឲ្យដឹងថា ជារៀងរាល់ឆ្នាំក្រសួងកិច្ចការនារីតែងតែសហការជាមួយស្ថាប័ន ពាក់ព័ន្ធអង្គការក៏ដូចជាក្រុមហ៊ុនឯកជននានាប្រារព្ធទិវាយុទ្ធនាការ ១៦ថ្ងៃនេះឡើងក្នុងគោលបំណងរួមចំណែកបញ្ឈប់នូវអំពើហិង្សាគ្រប់ រូបភាពមកលើស្ត្រីយុវវ័យនិងកុមារដើម្បីលើកកម្ពស់សុខដុមរមនា និងភាពរុងរឿងក្នុងគ្រួសារក៏ដូចជានៅកន្លែងធ្វើការ។

និយាយដល់ការជួញដូរមនុស្សលោកស្រី អ៊ឹង កន្ថាផាវីបានមានប្រសាសន៍ថា ឥឡូវរូបភាពវាមានច្រើនណាស់ហើយរាជរដ្ឋាភិបាលបាននិងកំពុងខិតខំរក វិធានការឲ្យមានប្រសិទ្ធភាពខ្ពស់។ លោកស្រីបានបញ្ជាក់ថាការខិតខំនេះគឺមិនមែនខិតខំឥឡូវនេះទេគឺ ខិតខំអស់រយៈពេលជាង១០ឆ្នាំមកហើយ ក៏ប៉ុន្តែវិធានការមួយចំនួនទទួលបានប្រសិទ្ធភាពខ្ពស់ដូចជាការ បង្ក្រាបអំពើជួញដូរមនុស្សការដែលនិយាយយ៉ាងដូច្នេះគឺដោយសារបញ្ជី ឃ្លាំមើលរបស់អាមេរិកដែលធ្វើឡើងដោយក្រសួងការបរទេសគេបានវាយតម្លៃ នៅលើពិភពលោកដោយពិនិត្យលើប្រទេសនីមួយៗគេឃើញថាប្រទេសកម្ពុជាបាន ខិតខំប្រឹងប្រែងយ៉ាងខ្លាំងក្នុងការបង្ក្រាបអំពើជួញដូរមាន ប្រសិទ្ធភាពខ្ពស់។ ដូច្នេះគេបានដំឡើងចំណាត់ថ្នាក់កម្ពុជាពីលេខ៣ដែលអាក្រក់ជាងគេ បំផុតមកលំដាប់ឃ្លាំមើល។

លោកស្រីបានបន្ថែមថា លំដាប់ឃ្លាំមើលបានន័យថា គេចុះមើលប្រទេសយើង២ដងក្នុង១ឆ្នាំគេឃ្លាំមើលថាតើយើងនៅបន្ត ការងារនេះមានប្រសិទ្ធភាពដែរឬទេ។ ឥឡូវនេះគេបានដំឡើងឋានៈយើងលំដាប់ថ្នាក់លេខ២។

លោកស្រីរដ្ឋមន្ត្រីបានមានប្រសាសន៍ទៀតថា ការងារមួយទៀតទទួលបានប្រសិទ្ធភាពដែរនោះក៏ប៉ុន្តែយើងរង់ចាំស្ថិតិ ដើម្បីបញ្ជាក់ថា យើងធ្វើមានប្រសិទ្ធភាពនោះគឺការងារអំពើហិង្សាក្នុងគ្រួសារ។ លោកស្រីបានបញ្ជាក់ថា អត្រាកន្លងមកតាមស្ថិតិរបស់នគរបាលជាតិបានឲ្យដឹងថាអំពើហិង្សា ក្នុងគ្រួសារអត់កើនឡើងនោះទេគឺនៅថេរហើយអាចចុះទៀត។ វិស័យទាំងពីរនេះយើងទទួលបានលទ្ធផលគួរឲ្យកត់សម្គាល់ដោយឡែករូបភាព មួយចំនួនទៀតដែលយើងខិតខំធ្វើទាក់ទងទៅនឹងអំពើរំលោភសេពសន្ថវៈ អត្រាមិនកើនឡើងនោះទេ ប៉ុន្តែអត្រាវានៅខ្ពស់ដែលយើងទទួលយកអត់បាននេះបើតាមស្ថិតិរបស់ នគរបាលជាតិ។

លោកមានប្រសាសន៍ថាអ្វីដែលយើងឃើញ និងគួរឲ្យព្រួយបារម្ភនោះគឺជនដែលប្រព្រឹត្តបទល្មើសនិងជនរងគ្រោះ កាន់តែក្មេងនេះជាបញ្ហាដែលយើងត្រូវដោះស្រាយក្នុងសង្គមយើង។ លោកស្រីបានបញ្ជាក់ថាការងារទាំងអស់នេះមិនមែនជារបស់រាជរដ្ឋាភិបាល តែម្នាក់ឯងនោះទេ គឺជាការងាររបស់យើងទាំងអស់គ្នាត្រូវចូលរួមចំណែកនៅពេលឃើញ ហេតុការណ៍អ្វីកើតឡើងត្រូវផ្ដល់ព័ត៌មានភ្លាមដើម្បីឈានទៅដល់ការ ចាប់ជនល្មើសយកមកផ្ដន្ទាទោសតាមច្បាប់ដើម្បីរកយុត្តិធម៌ជូន ជនរងគ្រោះភ្លាមៗនេះជាគោលនយោបាយរបស់រាជរដ្ឋាភិបាលក្នុងការផ្ដល់ យុត្តិធម៌ឲ្យទាន់ពេលវេលាជូនដល់ជនរងគ្រោះ៕

Source: http://women.open.org.kh/km/minister-of-women%27s-affairs-asking-for-careful-about-foreigner

កុមារកូនអ្នកក្រមានអត្រាស្លាប់ច្រើនជាងកូនអ្នកមាន៣ដង

Sokhayouk — Fri, 10 Sep 2010 12:35:28 +0000

វិធានការកាត់បន្ថយអត្រាមរណភាពកុមារថ្នាក់ជាតិ មិនត្រូវបានអនុវត្តព្រមៗគ្នា ក្នុងចំណោមក្រុមសង្គមសេដ្ឋកិច្ចទាំងអស់ឡើយ ហើយអត្រាកុមារ មកពីគ្រួសារកម្ពុជាក្រីក្របំផុត ២០ភាគរយ អាចរស់នៅលើសអាយុ៥ឆ្នាំ ហាក់ដូចជាមានអត្រាតិចជាង ៣ដង បើធៀបនឹងកុមារ ដែលមកពីក្រុមគ្រួសារជាអ្នកមានបំផុត ២០ភាគរយ។ នេះបើយោងតាមការព្រមានរបស់របាយការណ៍សកលថ្មីមួយនៃអង្គការក្រៅ រដ្ឋាភិបាល Save the Children។

របាយការណ៍ដែលគេឲ្យឈ្មោះថា “ឱកាសស្មើភាពគ្នា ដើម្បីរស់៖ មូលហេតុដែលវិសមភាពគឺជាបញ្ហានៃមរណភាពកុមារ” បានវែកញែកថា ប្រទេសកម្ពុជាអាចនឹងស្ថិតនៅលើគន្លងសម្រេចបាននូវគោលដៅអភិវឌ្ឍន៍ សហស្សវត្សពាក់ព័ន្ធនឹងមរណភាពកុមារ បើសិនជាការផ្ដល់នូវសេវាសុខភាពកុមារ ត្រូវបានបង្កើនឡើងឲ្យមានភាពស្មើគ្នាជាងនេះនោះ។ ផ្ទុយទៅវិញ របាយការណ៍នេះបានលើកឡើងថា គម្លាតរវាងអត្រាកុមារ នៅរស់ក្នុងចំណោមកុមារក្នុងគ្រួសារអ្នកមាន និងអ្នកក្រហាក់ដូចជាមានការកើនឡើង។

យោងតាមរបាយការណ៍នោះការវិវត្តរបស់ប្រទេសកម្ពុជា ឆ្ពោះទៅរកការសម្រេចបាននូវគោលដៅមរណភាពកុមារ ដែលអំពាវនាវឲ្យអត្រានេះធ្លាក់ចុះ ២ភាគ៣ រវាងពីឆ្នាំ ១៩៩០ និង២០១៥ មានការធ្លាក់ចុះយឺតជាងអត្រាមធ្យម នៃប្រទេសកំពុងអភិវឌ្ឍន៍៣១ ផ្សេងទៀត ដែលត្រូវបានវាយតម្លៃ។ ប្រទេសកម្ពុជា ហាក់ដូចជាមានការយឺតយ៉ាវ បើធៀបនឹងប្រទេសនានា ដូចជាប្រទេសបង់ក្លាដេស ដែលបានសម្រេចកាត់បន្ថយអត្រាស្លាប់កុមារ ស្ទើរតែទ្វេដង និងដោយសមភាពជាងទោះបីជាប្រទេសនេះ មានអត្រាកំណើនសេដ្ឋកិច្ចប្រចាំឆ្នាំទាបជាងកម្ពុជាក្ដី។

លោកស្រី អាណីកា រ៉ាប់បានី ប្រធានផ្នែកទំនាក់ទំនងនៃអង្គការ Save the Children បានថ្លែងថា ការរីកចម្រើនក្នុងការកាត់បន្ថយអត្រាស្លាប់របស់កុមារ នៅប្រទេសបង់ក្លាដេស គឺកើតឡើងដោយសារតែការផ្ដល់ថ្នាំបង្ការ ការព្យាបាលជំងឺរាករូស ការរៀបចំផែនការគ្រួសារ ហើយប្រាកដណាស់ គឺការផ្ដល់អំណាចដល់ស្ត្រីដែលស្ថិតក្នុងចំណោមកត្តាដទៃទៀត។

ការិយាល័យអង្គការ Save the Children ក្នុងស្រុក និងនៅប្រទេសអង់គ្លេស មិនអាចទាក់ទងបានទេកាលពីថ្ងៃអង្គារ។

លោកស្រី វីរីកា ប៊ែរដាហ្គា ប្រធានកម្មវិធីសង្គ្រោះកុមារ នៃអង្គការយូនីសេហ្វកម្ពុជា មានប្រសាសន៍កាលពីថ្ងៃអង្គារថា ផែនការអភិវឌ្ឍន៍យុទ្ធសាស្ត្រជាតិ និងផែនការដទៃទៀតរបស់រដ្ឋាភិបាលដែលលើកឡើងពាក់ព័ន្ធនឹងបញ្ហា សុខាភិបាល បញ្ជាក់យ៉ាងច្បាស់ថា សមភាព គឺជាគោលការណ៍នាំផ្លូវ។ លោកស្រីបានសង្កត់ន័យលើផែនការមួយដើម្បីពង្រីកថវិកាសម្រាប់អ្នកក្រ នៅទូទាំងប្រទេស និងបង្កើនសេវាកម្មនេះ នៅសហគមន៍ក្រីក្រ និងដាច់ស្រយាល។

លោកស្រី ប៊ែរដាហ្គា បានមានប្រសាសន៍ថា៖ “រដ្ឋាភិបាល យកចិត្តទុកដាក់ លើបញ្ហានេះ។ ឧបសគ្គគឺនៅត្រង់ការប្រតិបត្តិគោលការណ៍នេះ ឧទាហរណ៍ដូចជាខ្វះបុគ្គលិកជំនាញ និងមានឧបសគ្គផ្នែកភូមិសាស្ត្រ”។

របាយការណ៍នេះត្រូវបានចេញផ្សាយ គាប់ជួននឹងកិច្ចប្រជុំកំពូលស្ដីពីគោលដៅអភិវឌ្ឍន៍សហស្សវត្សសម្រាប់ ឆ្នាំ ២០១០ ដែលនឹងប្រារព្ធធ្វើឡើងក្នុងខែនេះ នៅក្រុងញូវយ៉ក៕

Source: http://women.open.org.kh/km/mortality-rate-of-poor-children-three-times-more-than-rich-children

គ.ជ.ប ចាប់ផ្ដើមនីតិវិធីចុះឈ្មោះបោះឆ្នោតឆ្នាំ២០១០

Sokhayouk — Fri, 10 Sep 2010 12:34:13 +0000

មន្ត្រីគណៈកម្មាធិការជាតិរៀបចំការបោះឆ្នោត គ.ជ.ប បានធ្វើការអំពាវនាវ ដល់អង្គការមិនមែនរដ្ឋាភិបាលជាតិ និងអន្តរជាតិ ដែលមានបំណងចូលរួមសង្កេតការណ៍សម្រាប់ការពិនិត្យបញ្ជីឈ្មោះ និងចុះឈ្មោះ បោះឆ្នោតឆ្នាំ២០១០ឲ្យទៅដាក់ពាក្យសុំចុះឈ្មោះនៅ គ.ជ.ប។

លោក អ៊ឹម សួស្ដី ប្រធាន គ.ជ.ប បានថ្លែងនៅក្នុងសន្និសីទសារព័ត៌មាន ស្ដីពីការប្រកាសផ្សព្វផ្សាយតារាង ស្ថិតិប្រជាពលរដ្ឋ និងចំនួនការិយាល័យបោះឆ្នោត នៅទីស្ដីការ គ.ជ.ប កាលពីម្សិលមិញថា ការដាក់ពាក្យសុំចុះឈ្មោះធ្វើជាអ្នកសង្កេតការណ៍ជាតិ អន្តរជាតិ សម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំនេះ នឹងចាប់ផ្ដើមពីថ្ងៃទី១៥កញ្ញា ចំណែកតំណាងគណបក្សនយោបាយនៅថ្ងៃទី២៣ ខែកញ្ញានេះ។

លោក អ៊ឹម សួស្ដី ថ្លែងថា «យើងសង្ឃឹមថា ពួកគេនឹងយកចិត្តទុកដាក់ សហការល្អ ដើម្បីជំរុញឲ្យការពិនិត្យបញ្ជីឈ្មោះ និងចុះឈ្មោះបោះឆ្នោត សម្រាប់ឆ្នាំ២០១០ ប្រព្រឹត្តទៅដោយជោគជ័យ»។

ការដាក់ពាក្យនឹងត្រូវធ្វើឡើងនៅគណៈកម្មាធិការជាតិរៀបចំការ បោះឆ្នោត ស្ថិតនៅក្នុងបរិវេណក្រសួងមហាផ្ទៃ។ នេះបើតាមសេចក្ដីជូនដំណឹងរបស់ គ.ជ.ប ចុះថ្ងៃទី៣ កញ្ញា។

លោក គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោតហៅកាត់ ខុម ហ្វ្រែល បានថ្លែងថា ការចូលរួមសង្កេតការណ៍ លើការចុះឈ្មោះឆ្នោតប្រចាំឆ្នាំ នឹងពុំសូវមានការចាប់អារម្មណ៍ និងយកចិត្តទុកដាក់ទេ។ ប៉ុន្តែលោកថ្លែងថា «វាត្រូវបានគេចាប់អារម្មណ៍ខ្លាំង នៅពេលដែលការបោះឆ្នោតជិតចូលមកដល់ ដើម្បីធានាថា បញ្ជីចុងក្រោយសម្រាប់ការបោះឆ្នោត វាមានលក្ខណៈត្រឹមត្រូវដែរឬអត់»។

គ.ជ.ប នឹងផ្ដល់សុពលភាពនិងប្រកាសផ្សព្វផ្សាយ បញ្ជីបោះឆ្នោតឆ្នាំនេះ នៅថ្ងៃទី៣១ ខែធ្នូ ខណៈពេលដែលការចាប់ផ្ដើមពិនិត្យបញ្ជីឈ្មោះ និងចុះឈ្មោះបោះឆ្នោត នៅតាមឃុំសង្កាត់ នឹងត្រូវចាប់ផ្ដើមពីថ្ងៃទី១តុលាដល់ថ្ងៃទី២០ខែតុលាផងដែរ៕

Source: http://women.open.org.kh/km/NEC-start-signature-election-2010

ឆមាសទី១ ឆ្នាំ២០១០ឥណទានផ្ដល់ដោយគ្រឹះស្ថានមីក្រូហិរញ្ញវត្ថុមានចំនួនជិត ១.៤០០ពាន់លានរៀល

Sokhayouk — Fri, 10 Sep 2010 12:33:02 +0000

ភ្នំពេញ៖ មន្ត្រីជាន់ខ្ពស់របស់ធនាគារជាតិនៃកម្ពុជាមួយរូបបានអះអាងថា គិតត្រឹមឆមាសទី១ ឆ្នាំ២០១០នេះ ឥណទានផ្ដល់ដោយគ្រឹះស្ថានមីក្រូហិរញ្ញវត្ថុ មានទឹកប្រាក់សរុបប្រមាណជិត ១.៤០០ពាន់លានរៀល (ប្រហែល៣៣០លានដុល្លារអាមេរិក) ដោយបានផ្ដល់ដល់អតិថិជនចំនួន ៨៨៩.១៣៦នាក់ ពោលគឺកើនឡើងចំនួន២៧ភាគរយ និង៨ភាគរយ រៀងគ្នាធៀបនឹងដំណាច់ឆ្នាំឆមាសទី១ ឆ្នាំ២០០៩។

លោកស្រី នាវ ច័ន្ទថាណា ទេសាភិបាលរងនៃធនាគារជាតិនៃកម្ពុជាបានមានប្រសាសន៍ថានៅក្នុង វេទិកាជាតិសម្រាប់អភិវឌ្ឍន៍វិស័យមីក្រូហិរញ្ញវត្ថុកាលពីថ្ងៃទី៦ ខែកញ្ញា នៅសណ្ឋាគារកាំបូឌីយ៉ាណាថា ក្រៅពីឥណទានផ្ដល់ដោយគ្រឹះស្ថានមីក្រូហិរញ្ញវត្ថុ ក៏មានប្រាក់បញ្ញើសរុបមានចំនួន៨៦ពាន់លានរៀល (ប្រហែលជា២១លានដុល្លារអាមេរិក)ដែរ ដែលទទួលបានពីអតិថិជនចំនួន ១១៧.៧៨១នាក់គឺកើនឡើង ២៣៦ភាគរយ និង ១០.៥ភាគរយរៀងគ្នា។

លោកស្រីបន្តថា គិតមកត្រឹមឆមាសទី១ឆ្នាំ២០១០ វិស័យមីក្រូហិរញ្ញវត្ថុមានអាជ្ញាប័ណ្ណចំនួន២១ក្នុងនោះគ្រឹះស្ថាន មីក្រូហិរញ្ញវត្ថុទទួលប្រាក់បញ្ញើពីអតិថិជនចំនួន៤ និងប្រតិបត្តិករឥណទានជនបទ ដែលបានចុះបញ្ជីនៅធនាគារជាតិនៃកម្ពុជាចំនួន២៧។ បន្ថែមលើនេះចំនួនគ្រឹះស្ថានមីក្រូហិរញ្ញវត្ថុ នៅថ្នាក់ឃុំមានចំនួនរហូតដល់ ៨.១២១ការិយាល័យ។ លោកស្រីបានបន្ថែមថា រីឯចំនួនស្ត្រីដែលទទួលបានសេវាប្រាក់កម្ចីមីក្រូហិរញ្ញវត្ថុមាន ចំនួន៧២១.៧២៥នាក់ពោលគឺប្រមាណ៨១ភាគរយ នៃចំនួនអ្នកខ្ចីប្រាក់សរុប។

លោកស្រី ច័ន្ទថាណា បានឲ្យដឹងទៀតថា អតិថិជនរបស់គ្រឹះស្ថានមីក្រូហិរញ្ញវត្ថុមិនត្រឹមតែទទួលបានផល ប្រយោជន៍តែខ្លួនឯងនោះប៉ុណ្ណោះទេ ផលប្រយោជន៍ជាវិជ្ជមាននេះក៏ផ្ដល់ដល់សមាជិកគ្រួសារ តាមរយៈការបង្កើតឲ្យមានការគាំពារលើម្ហូបអាហារសុខភាពការសិក្សា និងការចូលរួមក្នុងពិធីសង្គមរបស់ប្រជាជននៅតាមតំបន់ជនបទ។ លទ្ធផលនៃការទទួលបានសេវាមីក្រូហិរញ្ញវត្ថុដោយផ្ទាល់របស់ប្រជាជន ក្រីក្រនេះហើយ បានធ្វើឲ្យវិស័យមីក្រូហិរញ្ញវត្ថុនៅកម្ពុជារក្សាបានតួនាទីដ៏ ចាំបាច់របស់ខ្លួនក្នុងការកាត់បន្ថយភាពក្រីក្រ។ លោកស្រីបានបន្តថា ក្នុងន័យនេះការពិនិត្យឡើងវិញនូវតួនាទីរបស់គ្រឹះស្ថានមីក្រូ ហិរញ្ញវត្ថុក្នុងការរួមចំណែកកាត់បន្ថយភាពក្រីក្រនៅតែជាកត្តា ដ៏ចាំបាច់មួយដែលទាមទារឲ្យមានការចូលរួមយ៉ាងសកម្មពីគ្រប់ភាគី ពាក់ព័ន្ធ ដូចជាបណ្ដាក្រសួងនិងភ្នាក់ងាររបស់រាជរដ្ឋាភិបាលធនាគារជាតិនៃ កម្ពុជា ដែលជាអាជ្ញាធរអាណាព្យាបាលគ្រឹះស្ថានហិរញ្ញវត្ថុដៃគូអភិវឌ្ឍន៍នានា និងអង្គការក្រៅរដ្ឋាភិបាលដែលបានចុះបញ្ជីនៅធនាគារជាតិនៃកម្ពុជា។ ជាមួយគ្នានេះផងដែរ ការសហការរបស់ធនាគារជាតិនៃកម្ពុជាជាមួយបណ្ដាស្ថាប័នជាតិ និងអន្តរជាតិនឹងកាន់តែបន្តជំរុញតួនាទីរបស់មីក្រូហិរញ្ញវត្ថុ ក្នុងការបម្រើផលប្រយោជន៍ដ៏ចាំបាច់របស់ប្រជាជនក្រីក្រ។

លោកស្រីបានបញ្ជាក់ថា ក្នុងនាមជាអាជ្ញាធរអាណាព្យាបាលលើប្រព័ន្ធធនាគារនិងហិរញ្ញវត្ថុ ទាំងមូលធនាគារជាតិនៃកម្ពុជា នៅតែបន្តការប្ដេជ្ញារបស់ខ្លួនតាមរយៈការដាក់ចេញនូវច្បាប់និង បទប្បញ្ញត្តិនានា ដើម្បីធ្វើយ៉ាងណាឲ្យវិស័យមីក្រូហិរញ្ញវត្ថុកម្ពុជាបន្តការរីក ចម្រើនរបស់ខ្លួនប្រកបដោយតម្លាភាពនិងនិរន្តរភាព។ ធនាគារជាតិនៃកម្ពុជាបានប្រកាន់យកវិធីសាស្ត្រត្រួតពិនិត្យប្រកបដោយ ភាពប្រុងប្រយ័ត្នក្នុងន័យបង្កើតនូវបរិយាកាសងាយស្រួលនិងអំណោយផល ដល់ការពង្រីកប្រតិបត្តិការរបស់គ្រឹះស្ថានមីក្រូហិរញ្ញវត្ថុឲ្យបាន កាន់តែទូលំទូលាយបន្ថែមទៀត។ ការពិតបទប្បញ្ញត្តិនិងការត្រួតពិនិត្យលើវិស័យមីក្រូហិរញ្ញវត្ថុ មានលក្ខណៈជាជំហានៗដោយយោងទៅលើហានិភ័យដែលអាចកើតមានឡើងពី ប្រតិបត្តិការរបស់មីក្រូហិរញ្ញវត្ថុចំពោះផលប្រយោជន៍សាធារណៈនិង ប្រព័ន្ធហិរញ្ញវត្ថុជារួម។ ក្នុងនោះបទប្បញ្ញត្តិនិងអាជ្ញាប័ណ្ណសម្រាប់គ្រឹះស្ថានមីក្រូ ហិរញ្ញវត្ថុមានកម្រិតរួមមាន ការចុះបញ្ជី អាជ្ញាប័ណ្ណ និងអាជ្ញាប័ណ្ណទទួលប្រាក់បញ្ញើ៕

Source: http://women.open.org.kh/km/1st+semester-2010-credit-given-by-microfinance-nearly-1.400million-thousand-riels

កម្ពុជា នឹងអាចសម្រេចបានទៅតាមគោលដៅអភិវឌ្ឍន៍សហស្សវត្សលើអត្រាមរណភាពកុមារ

Sokhayouk — Fri, 10 Sep 2010 12:31:47 +0000

ទោះបីជានៅមានគម្លាតគួរឲ្យកត់សម្គាល់ រវាងគ្រួសារអ្នកក្រនិងអ្នកមាន នៅពេលគេនិយាយពីសេវាសុខភាពកុមារក្ដី កាលពី ថ្ងៃអង្គារ អ្នកជំនាញបានថ្លែងថា ពួកគេ មានសុទិដ្ឋិនិយមថា កម្ពុជាអាចនឹងសម្រេចបាននូវគោលដៅអភិវឌ្ឍន៍សហវត្សរ៍ ពាក់ព័ន្ធនឹងអត្រាមរណភាពកុមារ។

គោលដៅសកលបានអំពាវនាវឲ្យកាត់បន្ថយអត្រាគោល នៃមរណភាពពី ១២៤នាក់ ក្នុងការផ្ដល់កំណើត ១ពាន់លើក ឲ្យមកនៅត្រឹម៤១នាក់នៅឆ្នាំ២០១៥។ ដើម្បីសម្រេចបានតាមគោលដៅកែប្រែថ្មីរបស់ប្រទេសកម្ពុជា អត្រាមរណភាពកុមារ ត្រូវធ្លាក់មកនៅត្រឹម៦៦នាក់ នៅក្នុងការផ្ដល់កំណើត ១ពាន់លើក។

របាយការណ៍ដែលចេញផ្សាយកាលពីថ្ងៃអង្គារ ដោយអង្គការក្រៅរដ្ឋាភិបាល Save the Children បានលើកឡើងថា ការវិវត្តថ្នាក់ជាតិឆ្ពោះទៅរកគោលដៅនេះមិនបានដំណើរការស្មើៗ គ្នាឡើយ ហើយបង្ហាញថា ប្រទេសកម្ពុជាបានដើរខុសគន្លងមិនអាចសម្រេចបានតាមគោលដៅសកលឡើយ។

លោកស្រី សារ៉ុន វីលឃីសុន នាយកប្រចាំប្រទេសរបស់អង្គការ Care International នៅក្នុងប្រទេសកម្ពុជា បានថ្លែងថា ទោះបីលោកស្រី ពុំទាន់បានអានរបាយការណ៍នេះក្ដី លោកស្រីយល់ស្របជាមួយនឹងអត្ថន័យខ្លឹម របស់របាយការណ៍ដែលថា ការរីកចម្រើនផ្នែកសេដ្ឋកិច្ច ជះឥទ្ធិពលដល់ក្រុមអ្នកមានធនធាននានាខុសៗគ្នា ហើយនេះ ក្រោយមកអាចនឹងរួមចំណែកដល់ការធ្វើឲ្យមានគម្លាតកាន់តែខ្លាំងឡើង នូវអត្រាស្លាប់នៃកុមារសម្រាប់គ្រួសារអ្នកមានបំផុត ធៀបនឹងគ្រួសារអ្នកក្របំផុតក្នុងប្រទេស។ លោកស្រីបញ្ជាក់ថា៖ “ខណៈដែលអត្រាមរណភាពកុមារក្នុងប្រទេសកំពុងធ្លាក់ចុះវាជារឿងល្អ ប៉ុន្តែកុមារ២០ភាគរយ ដែលរស់នៅក្នុងភាពក្រីក្រ ដែលជាស្ថិតិតិចបំផុតនៅ តែមិនអាចរស់រានមានជីវិតបាន” នៅឡើយ។

លោកស្រី សារ៉ុន វីលឃីសុន បន្តថា អត្រាធ្លាក់ចុះទូទៅសម្រេចទៅបានដោយសារកត្តាជាច្រើនដែលរួមមានការ ពង្រីកឱកាសអប់រំសម្រាប់ស្ត្រី ការទទួលបានទឹកស្អាត និងការពង្រីកការផ្ដល់ថ្នាំបង្ការ និងការរៀបចំផែនការសម្រាប់គ្រួសារជាដើម។

ដោយភ្ជាប់អត្រាមរណភាពកុមារ ទៅនឹងអត្រាមរណភាពកុមារ ទៅនឹងអត្រាមរណភាពមាតា ដែលសម្រាប់ប្រទេសកម្ពុជាវានៅតែមានអត្រាខ្ពស់ពុំព្រមចុះសោះនោះ លោកស្រីបន្ថែមថាការធ្លាក់ចុះបន្ថែមទៀតអាចក្លាយទៅជាការពិត បើសិនជាមានពង្រីកកម្មវិធីថែរក្សាសុខភាពនៅពេលមានគភ៌ជាបន្ទាន់ នោះ។

លោកស្រីមានប្រសាសន៍ថា៖ “វាពិតជាមានទំនាក់ទំនងគ្នារវាងមរណភាពមាតា និងកុមារ។ យើងចង់ឲ្យមានឆន្ទៈ និងធនធានកាន់តែច្រើនថែមទៀត ត្រូវគេតម្រង់ទៅរកកម្មវិធីថែរក្សាគភ៌ជាបន្ទាន់”។

ដោយថ្លែងពីគោលការណ៍មរណភាពកុមារជាទូទៅ លោកស្រី សារ៉ុន វីលឃីសុន បញ្ជាក់ថា៖ “យើងអាចសម្រេចគោលដៅនោះបាន ប៉ុន្តែវានឹងត្រូវការឆន្ទៈនយោបាយ និងការប្ដេជ្ញាចិត្តខ្លាំង”។

លោកស្រី វីរីកា ប៊ែរដាហ្គាប្រធានកម្មវិធីសង្គ្រោះកុមាររបស់អង្គការយូនីសេហ្វកម្ពុជា កាន់តែមានសុទិដ្ឋិនិយមថែមទៀតពាក់ព័ន្ធទៅនឹងគោលដៅជាតិ ដែលកំណត់យកអត្រាមរណភាព ឲ្យនៅត្រឹម៦៦នាក់ ក្នុងការផ្ដល់កំណើត១ពាន់លើក។ លោកស្រីគូសបញ្ជាក់ថា៖”ប្រាកដណាស់ប្រទេសកម្ពុជានឹងសម្រេចតាមគោលដៅ អភិវឌ្ឍន៍សហស្សវត្សនេះ ហើយអាស្រ័យលើជោគជ័យនៃកម្មវិធីនានា ដែលកម្ពុជាគ្រោងនឹងអនុវត្ត ពួកគេអាចសម្រេចវាបានដោយសមភាព”។

ប៉ុន្តែលោក អ៊ូ កេវណ្ណា ប្រធានកម្មវិធីអាហារូបត្ថម្ភជាតិនៃមជ្ឈមណ្ឌលគាំពារសុខភាពមាតា និងទារកនៃក្រសួងសុខាភិបាលបានទទួលស្គាល់ថា ការជម្នះវិសមភាពរវាងគ្រួសារអ្នកមាន និងអ្នកក្រ នៅតែមានការលំបាក។ លោកមានប្រសាសន៍ថា៖ “វាតែងតែមានគម្លាតរវាងអ្នកមាន និងអ្នកក្រ ព្រោះអ្នកមានអាចទៅរកគ្រូពេទ្យដែលមានជំនាញ ឬទៅមន្ទីរពេទ្យដែលមានបរិក្ខារព្យាបាលទំនើបៗ ប៉ុន្តែអ្នកក្រមិនអាចធ្វើបែបនេះបានឡើយ”។

នៅពេលត្រូវបានសួរ អំពីលទ្ធភាពរបស់ប្រទេសកម្ពុជា ក្នុងការសម្រេចបានគោលដៅអភិវឌ្ឍន៍សហស្សវត្ស លើបញ្ហាមរណភាពកុមារ លោកបានឆ្លើយតបថា៖ “ខ្ញុំរំពឹងថា កម្ពុជានឹងសម្រេចបានគោលដៅកាត់បន្ថយអត្រាមរណភាពកុមារនៅឆ្នាំ២០១៥ ប៉ុន្តែក្រសួងសុខាភិបាលមិនអាចធ្វើការងារនេះតែម្នាក់ឯងបានទេ។ យើងត្រូវមានកិច្ចសហការពីស្ថាប័នពាក់ព័ន្ធ ស្ត្រីមានផ្ទៃពោះ និងអាជ្ញាធរមូលដ្ឋានគ្រប់លំដាប់ថ្នាក់”៕

Source: http://women.open.org.kh/km/cambodia-will-achive-MDG-on-child-mortality-rate

លោក ឯក សុនចាន់ ទទួលបានពានរង្វាន់ឧស្សាហកម្មទឹកស្អាត ប្រចាំឆ្នាំ២០១០

Sokhayouk — Fri, 10 Sep 2010 12:30:06 +0000

ប្រធានរដ្ឋាករទឹកស្វយ័តរាជធានីភ្នំពេញ លោក ឯក សុនចាន់ បានទទួលពានរង្វាន់ឧស្សាហកម្មទឹកស្អាតស្ដុកខ្លុម សម្រាប់ឆ្នាំ២០១០ពីប្រទេសស៊ុយអែត កាលពីថ្ងៃម្សិលមិញ។

លោក ឯក សុនចាន់ បានមានប្រសាសន៍ឲ្យដឹងថា លោកមានមោទនភាពណាស់ ដែលទទួលបានពានរង្វាន់នេះ សម្រាប់អង្គភាពរបស់លោក។ លោកលើកឡើងថា «យើងបានផ្ដល់ជាគំរូដ៏ល្អ សម្រាប់ការអភិវឌ្ឍន៍ប្រទេសដោយបានជួយធ្វើឲ្យការគិតរបស់ប្រទេស ដទៃ មកលើយើងមានភាពល្អប្រសើរជាលក្ខណៈអន្តរជាតិ បន្ទាប់ពីយើងបានរួចផុតពីសេចក្ដីវេទនា និងជំលោះផ្ទៃក្នុងអស់ជាច្រើនទសវត្សរ៍មក។

លោកមានប្រសាសន៍បន្តទៀតថា ពានរង្វាន់ ឧស្សាហកម្មទឹកស្អាតស្ដុកខ្លុម សម្រាប់ឆ្នាំ២០១០នេះបានធ្វើឲ្យអង្គភាពរបស់លោក អាចប្រៀបស្មើជាមួយអង្គភាព ឧស្សាហកម្មទឹកស្អាតលំដាប់ថ្នាក់ពិភពលោកដទៃទៀត ហើយរឹតតែជួយជំរុញឆន្ទៈរបស់លោកឲ្យកាន់តែខ្លាំងឡើង ក្នុងការសម្រេចឲ្យបានទៅតាមគោលដៅ នៅពេលអនាគត។

លោក ឯក សុនចាន់ បានឲ្យដឹងថា «ក្រុមការងាររបស់ខ្ញុំ ត្រូវបានលើកទឹកចិត្តដោយពានរង្វាន់ពិភពលោក ប្រកបដោយកិត្យានុភាពនេះ ដើម្បីឆ្ពោះទៅរកការបន្តបេសកកម្ម បង្កើនប្រសិទ្ធភាព និងធ្វើឲ្យប្រសើរឡើង នូវនិយតកម្មទឹក និងលទ្ធភាពចែកចាយទឹកស្អាត ទៅដល់ប្រជាជនក្រីក្រ»។

គណៈមេប្រយោគ ដែលសម្រេចផ្ដល់រង្វាន់អន្តរជាតិ បានវាយតម្លៃថា រដ្ឋាករទឹកស្វ័យតរាជធានីភ្នំពេញ បានជោគជ័យ ក្នុងការលុបបំបាត់នូវអំពើពុករលួយ ដែលនេះបានជួយឲ្យមានភាពជោគជ័យក្នុងការអភិវឌ្ឍប្រទេស ឈរលើគំរូ ជាមូលដ្ឋានយ៉ាងសាមញ្ញប៉ុន្តែវិធីគ្រប់គ្រង មានប្រសិទ្ធភាពដោយពឹងផ្អែកទៅលើគោលការណ៍ យុទ្ធសាស្ត្រល្អ និងអាចទទួលយកបាន។ ក្រុមគណៈមេប្រយោគបានឲ្យដឹងថា រដ្ឋាករទឹកស្វយ័តរាជធានីភ្នំពេញ អាចជួយខ្លួនឯងបានគ្រប់គ្រាន់ ដោយអាចដំណើរការ បានដោយគ្មានប្រាក់ជំនួយពីរដ្ឋ។

មកដល់បច្ចុប្បន្ននេះ រដ្ឋាករទឹកស្វយ័តក្រុងភ្នំពេញ បានផ្គត់ផ្គង់សេវាកម្មទឹក២៤ម៉ោង លើ២៤ម៉ោង ហើយគ្របដណ្ដប់បាន៩០ភាគរយនៅទីក្រុងភ្នំពេញ ដែលមានប្រជាជនរស់នៅប្រហែល១លានបីសែននាក់ ហើយបានគ្រប់គ្រងតម្លៃរបស់ខ្លួនបានល្អប្រសើរខណៈពេលដែលអង្គភាព នៅតែបន្តអភិវឌ្ឍ ទាំងផ្នែកហេដ្ឋារចនាសម្ព័ន្ធ និងការគ្រប់គ្រង។

ជ័យលាភីពានរង្វាន់ឧស្សាហកម្មទឹកស្អាតស្ដុកខ្លុម សម្រាប់ឆ្នាំ២០១០ត្រូវបានប្រកាសជាផ្លូវការ កាលពីថ្ងៃទី២ ខែសីហា ឆ្នាំ២០១០ ដោយមានបេក្ខជនចំនួន៦៤រូប មកពីបណ្ដាប្រទេសនានាចូលរួមប្រកួតយកពានរង្វាន់នេះ។ ពានរង្វាន់នេះ ត្រូវបានបង្កើតឡើងនៅឆ្នាំ២០០០ ក្នុងគោលបំណងជំរុញលើកទឹកចិត្ត ឲ្យមានការដោះស្រាយបញ្ហាទឹកស្អាតសម្រាប់សាធារណជន នៅទូទាំងពិភពលោក៕

Source: http://women.open.org.kh/km/Eksokchan-recieve-award-for-clean-water

បើកកិច្ចប្រជុំពិគ្រោះយោបល់មួយដើម្បីទប់ស្កាត់ការរំលោភសេពសន្ថវៈលើស្ត្រីនិងកុមារ

Sokhayouk — Fri, 10 Sep 2010 12:27:55 +0000

ភ្នំពេញ៖ ជាមួយនឹងការកើនឡើងនៃការរំលោភសេពសន្ថវៈលើស្ត្រីនិងកុមារកាន់តែ មានភាពព្រៃផ្សៃនោះ ក្រសួងកិច្ចការនារីបានបើកកិច្ចប្រជុំពិគ្រោះយោបល់មួយ ដើម្បីពិភាក្សារកមធ្យោបាយ និងទប់ស្កាត់បញ្ហារំលោភសេពសន្ថវៈ និងរំលោភបំពានផ្លូវភេទលើស្ត្រីនិងកុមារកាលពីថ្ងៃទី៧ ខែកញ្ញា ក្រោមអធិបតីភាពលោកស្រី ម៉ែន សំអន ឧបនាយករដ្ឋមន្ត្រី ដោយមានការចូលរួមពី លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី តំណាងព្រឹទ្ធសភា រដ្ឋសភា ក្រសួងមហាផ្ទៃ ក្រសួងយុត្តិធម៌ និងស្ថាប័នពាក់ព័ន្ធផ្សេងៗទៀត។

លោកស្រី អ៊ឹង កន្ថាផាវី បានមានប្រសាសន៍ថា យោងតាមស្ថិតិរបស់នគរបាលជាតិបានឲ្យដឹងថា នៅឆ្នាំ២០០៩ សភាពការណ៍បទល្មើសកើតឡើងចំនួន៤៦៨លើក បើធៀបទៅនឹងឆ្នាំ២០០៨ មានការកើនឡើង២១ ,២៤ភាគរយ ដែលមានចំនួនតែ៣៨៦ភាគរយ។ ក្នុងបទល្មើសនេះរួមមានរំលោភសេពសន្ថវៈ ២១៨លើក រំលោភសម្លាប់ចំនួន៣លើកប៉ុនប៉ងរំលោភ៦៩លើក បៀតបៀនកេរខ្មាស១៩លើក និងអំពើហិង្សាក្នុងគ្រួសារ១៥៩លើក។

លោកស្រីរដ្ឋមន្ត្រីបានបន្តថា យោងតាមស្ថិតិរបស់ក្រសួងមហាផ្ទៃ បានឲ្យដឹងថា ជនរងគ្រោះដោយសាររំលោភសេពសន្ថវៈអាយុចាប់ពី ២ឆ្នាំ ដល់ ១៧ឆ្នាំ មាន៥០ភាគរយ។ នេះជាបញ្ហាមួយគួរឲ្យព្រួយបារម្ភដោយសារតែជនរងគ្រោះកាន់តែក្មេងៗ ឡើង។

លោកស្រីបានបញ្ជាក់ថា ជាមួយនឹងការកើនឡើងយ៉ាងដូច្នេះហើយ ទើបមានកិច្ចប្រជុំនេះឡើងដើម្បីពិភាក្សារកយុទ្ធសាស្ត្រ មធ្យោបាយ និងបង្កើនកិច្ចសហប្រតិបត្តិការជាមួយក្រសួងពាក់ព័ន្ធ និងស្ថាប័នផ្សេងៗទៀតក្នុងការកាត់បន្ថយនូវអត្រានេះ។

មានប្រសាសន៍នាឱកាសនោះលោកស្រី ម៉ែន សំអន បានបញ្ជាក់ថា ការរំលោភបំពានផ្លូវភេទទៅលើស្ត្រីនិងកុមារី ករណីឳពុករំលោភកូន-ជីតារំលោភចៅ ការរំលោភជាក្រុម ការរំលោភហើយសម្លាប់ទាំងគ្រួសារគឺពិតជាអំពើអមនុស្សធម៌ដ៏សាហាវ យង់ឃ្នង។ លោកស្រីមានក្ដីអាណិតអាសូរចំពោះស្ត្រីដែលជាជនរងគ្រោះជាពិសេស កុមារីដែលជាជនរងគ្រោះ ជាពិសេសកុមារីតូចៗដែលជាវ័យត្រូវទទួលនូវការបីបាច់ថែរក្សា តែបែរជាទទួលរងនូវអំពើដ៏គួរឲ្យស្អប់ខ្ពើមទៅវិញ។

លោកស្រី ម៉ែន សអន បានឲ្យទៀតថា ពាក់ព័ន្ធនឹងបញ្ហាស្ត្រី រួមទាំងបញ្ហារំលោភបំពានផ្លូវភេទនេះ រាជរដ្ឋាភិបាលបានខិតខំប្រឹងប្រែងប្រកបដោយឆន្ទៈខ្ពស់ក្នុងការ ឆ្លើយតបតាមរយៈការងារជាច្រើនដូចជា បានបង្កើតគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរដែលមានលោកជំទាវ ប៊ុន រ៉ានី ហ៊ុន សែន ជាប្រធានកិត្តិយសបានចុះហត្ថលេខា និងបានឲ្យសច្ចាប័នទៅលើអនុសញ្ញាស្ដីពីការលុបបំបាត់រាល់ទម្រង់នៃ ការរើសអើងប្រឆាំងនឹងនារីភេទតាំងពីឆ្នាំ១៩៩២ បានបង្កើតក្រុមប្រឹក្សាជាតិដើម្បីស្ត្រីនៅឆ្នាំ២០០១ ដែលមានសម្ដេចព្រះរាជអគ្គមហេសី នរោត្តម មុនីនាថ សីហនុ ជាព្រះប្រធានកិត្តិយស និងសម្ដេចតេជោ ហ៊ុន សែន ជាអនុប្រធានកិត្តិយស និងបានរៀបចំច្បាប់ពាក់ព័ន្ធមួយចំនួន និងបានទទួលការអនុម័តពីរដ្ឋសភា ព្រឹទ្ធសភា និងព្រះមហាក្សត្រ ដូចជាច្បាប់ស្ដីពី ការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ច្បាប់ស្ដីពីការបង្ក្រាបអំពើជួញដូរមនុស្ស និងការធ្វើអាជីវកម្មផ្លូវភេទដែលមានចែងយ៉ាងច្បាស់អំពីការដាក់ ទោសទណ្ឌទៅលើអំពើរួមភេទជាមួយអនីតិជនអាយុក្រោម១៥ឆ្នាំ និងក្រមព្រហ្មទណ្ឌដែលទើបនឹងផ្សព្វផ្សាយប៉ុន្មានខែកន្លងមកនេះ ហើយដែលនឹងត្រូវដាក់ឲ្យអនុវត្តនៅអំឡុងដំណាច់ឆ្នាំ២០១០ ខាងមុខនេះ៕

Source: http://women.open.org.kh/km/urgent-meeting-on-preventing-raping-women-and-children

អ្នកនយោបាយពិភាក្សាពីវិធានការបញ្ចូលស្ត្រីក្នុងនយោបាយ

Sokhayouk — Fri, 10 Sep 2010 12:26:52 +0000

ភ្នំពេញ៖ គោលដៅអភិវឌ្ឍន៍សហស្សវត្សរ៍ផ្នែកទី៣ (MDG3) បានចែងអំពីការលើកតម្កើងសមាសភាពយេនឌ័រ និងពង្រឹងសិទ្ធិអំណាចស្ត្រីទៅក្នុងឆាកនយោបាយ។ គោលដៅអភិវឌ្ឍន៍សហស្សវត្សរ៍ (Millennium Development Goals) នឹងត្រូវផុតកំណត់នៅឆ្នាំ២០១៥។ រដ្ឋាភិបាលបានដាក់ទិសដៅបង្កើនចំនួនស្ត្រីនៅក្នុងស្ថាប័ននយោបាយ (រដ្ឋសភា និងព្រឹទ្ធសភា) ឲ្យបានដល់ចំនួន៣០ភាគរយនៅឆ្នាំ២០១៥នោះ។ ប៉ុន្តែនិន្នាការហាក់បានកំពុងនៅយឺតយ៉ាវនៅឡើយ នៅពេលដែលស្ថាប័ននឹងត្រូវឆ្លងកាត់ការបោះឆ្នោតតែម្ដងទៀត ប៉ុណ្ណោះមុនដល់ឆ្នាំ២០១៥។

សព្វថ្ងៃនេះ នៅក្នុងរដ្ឋសភាតំណាងរាស្ត្រស្ត្រីមានចំនួន២៧រូប ក្នុងចំណោមអាសនៈសរុប១២៣ (ត្រូវជា២១ភាគរយ)។ ស្របពេលជាមួយគ្នានេះក្នុងស្ថាប័នព្រឹទ្ធសភា ដែលជាសភាជាន់ខ្ពស់ មានសមាជិកព្រឹទ្ធសភាជាស្ត្រីតែ៨រូបប៉ុណ្ណោះក្នុងចំណោមអាសនៈ សរុបចំនួន៦៣ (ស្ត្រីមាន១៣ភាគរយ)។ សមាមាត្រនេះនៅទាបជាងកម្រិតមធ្យមនៅលើពិភពលោក និងនៅក្នុងតំបន់។ ស្ថាប័នព្រឹទ្ធសភាដែលត្រូវបោះឆ្នោតរៀងរាល់៥ឆ្នាំម្ដងនោះនឹង ត្រូវឆ្លងកាត់ការបោះឆ្នោតនីតិកាលថ្មីឆ្នាំ២០១២ហើយរដ្ឋសភាដែល ត្រូវបោះឆ្នោតរៀងរាល់៥ឆ្នាំម្ដងដែរនោះ នឹងត្រូវឆ្លងកាត់ការបោះឆ្នោតនីតិកាលថ្មីនៅឆ្នាំ២០១៣។ ដូច្នេះពេលវេលាដែលនៅសល់សម្រាប់រដ្ឋសភានិងព្រឹទ្ធសភា មានតែម្ដងតែប៉ុណ្ណោះ ដើម្បីបញ្ចូលស្ត្រីឲ្យគ្រប់៣០ភាគរយ ទៅក្នុងស្ថាប័ននីតិប្បញ្ញត្តិនីមួយៗ។ បានន័យថា នៅក្នុងការបោះឆ្នោតខាងមុខរដ្ឋសភាត្រូវបំពេញចំនួនស្ត្រី តំណាងរាស្ត្រឲ្យបាន៩ភាគរយទៀត។ ហើយព្រឹទ្ធសភាវិញ ត្រូវបង្កើនសមាជិកខ្លួនជាស្ត្រីឲ្យបាន១៧ភាគរយថែមទៀតដែរ ដើម្បីឆ្លើយតបតាមទិសដៅរបស់កម្ពុជាដែលកំណាត់បង្កើនស្ត្រីនៅ ក្នុងស្ថាប័នកំពូលទាំង២នេះ ឲ្យបានដល់៣០ភាគរយ នៃសមាជិកសរុបនៅក្នុងឆ្នាំ២០១៥ ដែលជាឆ្នាំឱសានវាទនៃគោលដៅអភិវឌ្ឍន៍សហស្សវត្សរ៍ MDG។

តើធ្វើដូចម្ដេចនិងថា តើត្រូវមានវិធានការបែបណាដើម្បីបង្កើនចំនួនស្ត្រីទៅក្នុងឆាក នយោបាយ? នេះគឺជាប្រធានបទនៃសិក្ខាសាលាមួយដែលកំពុងប្រព្រឹត្តទៅពីថ្ងៃទី ៦ដល់ថ្ងៃទី១០កញ្ញានេះ។ ក្រៅពីសមាជិករដ្ឋសភាព្រឹទ្ធសភា និងតំណាងរដ្ឋាភិបាលកម្ពុជាអ្នកជំនាញបរទេសមកពីប្រទេសស៊ុយអែត និងកូរ៉េខាងត្បូង សមាជិកសភាមកពីប្រទេសវៀតណាមទីម័រខាងកើត និងប្រទេសឡាវ ក៏មានវត្តមាននៅក្នុងសិក្ខាសាលានេះដើម្បីចែករំលែកបទពិសោធន៍ និងគំនិតក្នុងការបង្កើតកូតាស្ត្រីទៅក្នុងឆាកនយោបាយ។

នៅក្នុងពិធីបើកសិក្ខាសាលាជាផ្លូវការ ដែលត្រូវបានរៀបចំកាលពីថ្ងៃទី៨កញ្ញាម្សិលមិញ នៅសណ្ឋាគារឡឺរ៉ូយ៉ាល់ លោកស្រី ម៉ែន សំអន ឧបនាយករដ្ឋមន្ត្រី បានថ្លែងកត់សម្គាល់អំពីការរីកចម្រើនដែលរដ្ឋាភិបាលសម្រេចបានឆ្ពោះ ទៅសម្រេចគោលដៅអភិវឌ្ឍន៍សហស្សវត្សរ៍នេះ នៅក្នុងការជំរុញសមភាពយេនឌ័រ និងការពង្រឹងសិទ្ធិអំណាចរបស់ស្ត្រីនៅក្នុងរដ្ឋសភា និងព្រឹទ្ធសភារយៈពេល១៥ឆ្នាំកន្លងមកនេះ។ នៅចំពោះមុខភ្ញៀវជាតិ និងអន្តរជាតិ លោកស្រី ម៉ែន សំអន បានមានប្រសាសន៍យ៉ាងដូច្នេះ «យើងបានកំណត់ចំណុចដៅប្រកបដោយមហិច្ឆតាដូចដែលលោក លោកស្រីជ្រាបស្រាប់ហើយថា តំណាងជាស្ត្រីចំនួន៣០ភាគរយ នៅក្នុងស្ថាប័ននីតិប្បញ្ញត្តិរបស់ជាតិ ត្រូវបានគេទទួលស្គាល់យ៉ាងច្បាស់ថា ជាចំនួនដ៏ច្រើនដែលចាំបាច់ ដើម្បីឲ្យស្ត្រីអាចរួមចំណែកយ៉ាងមានប្រយោជន៍នៅក្នុងកិច្ចការដែល តាមធម្មតាច្រើនតែគ្របដណ្ដប់ដោយបុរស»។

សេចក្ដីប្រកាសព័ត៌មានរបស់យូអិនឌីភី UNDP បានសរសេរថា បើទោះជាមានការរីកចម្រើនខ្លះៗហើយក៏ដោយ ជារួមស្ត្រីកម្ពុជាបន្តប្រឈមនឹងភាពចាញ់ប្រៀបខាងសេដ្ឋកិច្ច សង្គមធៀបនឹងបុរស។ លោក ដូក្លាស់ ប្រូដេរិក Douglas Broderick អ្នកសម្របសម្រួលអង្គការសហប្រជាជាតិប្រចាំកម្ពុជា បានថ្លែងនៅក្នុងសិក្ខាសាលានោះថា ដើម្បីផ្ដល់ចលករដល់គោលដៅអភិវឌ្ឍន៍សហស្សវត្សរ៍ថ្មីៗនេះ អគ្គលេខាធិការ អ.ស.ប បានបង្កើតក្រុមស្ត្រីនៃ អ.ស.ប (UN women) ដែលជាទីភ្នាក់ងារមួយទទួលបន្ទុកបង្រួបបង្រួម និងពង្រឹងគោលនយោបាយយេនឌ័រ និងការងាររបស់ អ.ស.ប នៅទូទាំងពិភពលោក។

លោកប្រូដេរិកបានបញ្ជាក់ថា «នៅកម្ពុជាយេនឌ័រ គឺជាសសរស្ដម្ភ និងជាកិច្ចការអន្តរវិស័យដ៏សំខាន់ ដែលត្រូវបានទទួលការយកចិត្តទុកដាក់នៅក្នុងការងាររស់គ្រប់ទី ភ្នាក់ងាររបស់ អ.ស.ប នៅក្នុងរយៈពេល៥ឆ្នាំខាងមុខនេះ។ ស្ត្រីមានចំនួនដល់៥២ភាគរយ នៃចំនួនប្រជាពលរដ្ឋកម្ពុជាសរុប។ ប៉ុន្តែពួកគេមានតំណាងត្រឹមតែ១៣ភាគរយ នៅក្នុងព្រឹទ្ធសភា និង២១ភាគរយ នៅក្នុងរដ្ឋសភា។ បើគ្មានតំណាងឲ្យបានគ្រប់គ្រាន់សំឡេងស្ត្រីមិនត្រូវបានឮឡើយ»។

បើតាមការអត្ថាធិប្បាយ របស់អ្នកសម្របសម្រួលអង្គការសហប្រជាជាតិប្រចាំកម្ពុជាដដែល ប្រការសំខាន់ដើម្បីសម្រេច MDG3 គឺការកៀរគរឆន្ទៈ និងការប្ដេជ្ញាខាងនយោបាយ ដើម្បីឲ្យមានចំនួនស្ត្រីកាន់តែច្រើនថែមទៀតក្នុងឆាកនយោបាយ៕

Source: http://women.open.org.kh/km/politician-discuss-women-participate-politics

មន្ត្រីអំពាវនាវឲ្យពលរដ្ឋប្រយ័ត្ន ក្នុងការបង់ពន្ធឆ្នាំ ២០១០ ព្រោះមានក្លែងក្លាយ

Sokhayouk — Fri, 10 Sep 2010 12:25:44 +0000

មន្ត្រីក្រសួងសេដ្ឋកិច្ច និងហិរញ្ញវត្ថុបានអំពាវនាវដល់ប្រជាពលរដ្ឋ កុំឲ្យទិញប័ណ្ណបង់ពន្ធផ្លូវ លើមធ្យោបាយធ្វើដំណើរក្នុងឆ្នាំ២០១០ នៅកន្លែងផ្សេង ក្រៅពីភ្នាក់ងារមន្ត្រីពន្ធដារ របស់អគ្គនាយកដ្ឋានពន្ធដារ ដែលត្រូវបានកំណត់ទីតាំងរួចហើយ ដើម្បីជៀសវាងការទិញប៉ះប័ណ្ណបង់ពន្ធក្លែងក្លាយ។

ការអំពាវនាវនេះ បានកើតឡើងក្រោយពីសមត្ថកិច្ចខណ្ឌចំការមនកាលពីថ្ងៃទី០៦ សីហា ចាប់បានជនសង្ស័យពីរនាក់ ដែលបានធ្វើសកម្មភាពលក់បង្កាន់ដៃបង់ពន្ធផ្លូវក្លែងក្លាយ ឆ្នាំ២០១០ ទៅឲ្យប្រជាពលរដ្ឋប្រើប្រាស់។

អគ្គនាយកដ្ឋានពន្ធដារ បានចេញសេចក្ដីជូនដំណឹងមួយ កាលពីថ្ងៃទី ១៦ ខែសីហា ឆ្នាំ២០១០ ដែលត្រូវអនុវត្តចាប់ពីថ្ងៃទី២០ ខែតុលា ឆ្នាំ២០១០ បើពុំនោះទេ នាយកដ្ឋាននេះ នឹងធ្វើការផាកពិន័យ។

លោក គង់ វិបុល រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ បានប្រាប់ភ្នំពេញប៉ុស្តិ៍ កាលពីម្សិលមិញថា ក្រសួងសេដ្ឋកិច្ច នឹងធ្វើការពង្រឹងការផ្សព្វផ្សាយទៅដល់ប្រជាពលរដ្ឋ ឲ្យទិញបង្កាន់ដៃបង់ពន្ធ លើមធ្យោបាយធ្វើដំណើរពីមន្ត្រីពន្ធដារ របស់អគ្គនាយកដ្ឋានពន្ធដារ ដើម្បីធានាបាននូវការបង់ពន្ធត្រឹមត្រូវ។

លោកបញ្ជាក់ថា៖ “យើងនឹងធ្វើការពង្រឹងកិច្ចសហការជាមួយនឹងសមត្ថកិច្ចនគរបាលជាតិ និងអាជ្ញាធរមូលដ្ឋាន ដើម្បីស្វែងរក និងទប់ស្កាត់ជនណាដែលប្រព្រឹត្តការក្លែងបន្លំនេះ ដើម្បីយកមកផ្ដន្ទាទោសតាមផ្លូវច្បាប់”។

នៅត្រង់ចំណុចទី៦ នៃសេចក្ដីជូនដំណឹងរបស់អគ្គនាយកដ្ឋានពន្ធដារ បានព្រមានថា ក្រសួងសេដ្ឋកិច្ច និងហិរញ្ញវត្ថុ នឹងចាត់វិធានការតាមផ្លូវច្បាប់ រួមជាមួយក្រសួងមានសមត្ថកិច្ច ដើម្បីចាប់ឃាត់ជនទាំងឡាយណាដែលបានលួចបន្លំ បោះពុម្ព ធ្វើអាជីវកម្មលក់ដូរ និងប្រើប្រាស់ប័ណ្ណក្លែងក្លាយទាំងនេះ។ សេចក្ដីជូនដំណឹងខាងលើក៏បានបញ្ជាក់ផងដែរថា អ្នកបង់ពន្ធផ្លូវ ត្រូវបង់ពន្ធ ឲ្យចំទីតាំងប្រមូលពន្ធ ដែលមានភ្នាក់ងារពន្ធដារជាអ្នកប្រមូលពន្ធ។

លោក គង់ វិបុល បានបញ្ជាក់ថា ការក្លែងបន្លំពន្ធនេះ បានធ្វើឲ្យប៉ះពាល់ដល់ចំណូលនៃការប្រមូលពន្ធរបស់រដ្ឋ ប៉ុន្តែនៅមានកម្រិតតិចតួចនៅឡើយនៅពេលនេះ ដោយសារតែមានវិធានការទាន់ពេលវេលា។ លោកបន្ថែមថា៖ “យើងចាប់បានប័ណ្ណក្លែងក្លាយចំនួន៧០ សន្លឹក ដូច្នេះ យើងខំពង្រឹងកិច្ចសហប្រតិបត្តិការជាមួយនឹងសមត្ថកិច្ចបន្តទៀត”។

បើតាមលោក គង់ វិបុល ចំណូលបានពីការប្រមូលពន្ធ លើមធ្យោបាយធ្វើដំណើរបានចំនួនប្រមាណជា១៥លានដុល្លារអាមេរិក កាលពីឆ្នាំ២០០៩។

អង្គការសង្គមស៊ីវិលកាលពីថ្ងៃទី១៦ ខែសីហា នៅក្នុងសន្និសីទសារព័ត៌មានមួយ ស្ដីពី យុទ្ធនាការប្រឆាំងអំពើពុករលួយក្នុងការប្រមូលពន្ធ លើសពីតម្លៃកំណត់លើមធ្យោបាយធ្វើដំណើរគ្រប់ប្រភេទបានប៉ាន់ប្រមាណ ថា ប្រជាពលរដ្ឋកម្ពុជាបានចំណាយប្រាក់សរុបប្រមាណ១លានដុល្លារអាមេរិក ក្នុងមួយឆ្នាំ។ ដែលបានបង់ពន្ធលើយានយន្តលើសពីតម្លៃកំណត់ ទៅឲ្យមន្ត្រីអគ្គនាយកដ្ឋានពន្ធដារ ដែលបានប្រព្រឹត្តអំពើពុករលួយ។

បើតាមអង្គការសង្គមស៊ីវិលបច្ចុប្បន្នប្រទេសកម្ពុជាមានយានយន្តជាង ១លាន៣សែនគ្រឿងក្នុងនោះមានម៉ូតូជាង១លាន១សែនគ្រឿង ត្រូវបានចុះបញ្ជី។

លោក ស៊ឹម អៀង អគ្គនាយកអគ្គនាយកដ្ឋានពន្ធដារ មិនអាចសុំការពន្យល់បានទេ៕

Source: http://women.open.org.kh/km/official-summon-citizens-careful-duty-2010

Sokhayouk

អ្នក​ជំនាញ​ជួប​ពិភាក្សា​លើ​សេចក្ដី​ព្រាងច្បាប់​យុត្តិធម៌​អនីតិជន

កុមារ​កូន​អ្នកក្រ​មាន​អត្រា​ស្លាប់​ច្រើន​ជាង​កូន​អ្នក​មាន​៣ដង

គ.ជ.ប ចាប់​​ផ្ដើម​នីតិវិធី​ចុះ​ឈ្មោះ​បោះឆ្នោត​​ឆ្នាំ​២០១០

ឆមាស​ទី១ ឆ្នាំ២០១០​ឥណទាន​ផ្ដល់​ដោយ​គ្រឹះស្ថាន​មីក្រូ​ហិរញ្ញវត្ថុ​មាន​ចំនួន​ជិត ១.៤០០ពាន់លាន​រៀល

កម្ពុជា នឹង​អាច​សម្រេច​បាន​ទៅ​តាម​គោលដៅ​អភិវឌ្ឍន៍​សហស្សវត្ស​លើ​អត្រា​មរណភាព​កុមារ

លោក​ ឯក​ សុនចាន់​ ទទួល​បាន​ពាន​រង្វាន់​ឧស្សាហកម្ម​ទឹក​ស្អាត​ ប្រចាំ​ឆ្នាំ​២០១០

បើក​កិច្ច​ប្រជុំ​ពិគ្រោះ​យោបល់​មួយ​ដើម្បី​ទប់ស្កាត់​ការ​រំលោភ​សេពសន្ថវៈ​លើ​ស្ត្រី​និង​កុមារ

អ្នក​នយោបាយ​ពិភាក្សា​ពី​វិធានការ​បញ្ចូល​ស្ត្រី​ក្នុង​នយោបាយ

មន្ត្រី​អំពាវនាវ​ឲ្យ​ពលរដ្ឋ​ប្រយ័ត្ន ក្នុង​ការ​បង់ពន្ធ​ឆ្នាំ ២០១០ ព្រោះ​មាន​ក្លែង​ក្លាយ